Wednesday, December 28, 2016

:: අළුත් නැන්දා ::

අළුත් නැන්දා හරිම දස්සයි
පිඟානම බත් කවනවා
එයා ඇඳුමක් ගන්න ගානට
මටත් ගවුමක් ලැබෙනවා

තාත්තට  දැං රෑට වැඩ නෑ
කලින් ගෙදරට ඇදෙනවා
හරිම පුදුමයි පරණ සුදු කෙස්
එක සැරේ කළු ගැහෙනවා

වගේ වග නෑ අපේ නංගිට
නැන්දා තුරුලේ දැපෙනවා
ඒත් අම්මේ රෑට මට නම්
හුඟක් හීතල දැනෙනවා

රාක්කෙට වැඩිවුණ පොටෝවක්
මගේ කාමරෙ තියෙනවා
අනේ අම්මේ රෑට හීනෙන්
නුඹෙ රූපෙ පණ ගන්නවා



Tuesday, December 13, 2016

:: රැළි සහ ටියුලිප් ::

" ඔයාව මීට කලින් කවුරුත් ම මෙහෙම ඉඹලා නැද්ද ? "
ඔහු. මුද්ද ලූ ඇඟිල්ල ද ඇතුල්ව අනෙක් ඇඟිලි හතරම වමතේ ඇඟිලි හා පටලමින් තැනූ මන්දට ඈ සිර කරකර ගනිමින් ඇසී ය.


ඇය. සිනාසුනාය. නෙත් පියා ගනිමින්.  සිය ලවන් ඔහු නළල මත ඇතිරුවා ය. සිය වටොරෙහි බර ඔහු දෑත් මත පටවමින්.
"ඉඹලා තියෙනවා "

මුද්ද. අනෙක් අතෙහි මැඳගිල්ලත් වෙදැගිල්ලත් අතර තදින් තෙරපුණෙේ ය. ස්වරතන්තු වලට සංඥා යවමින්.

" මං කිව්වෙ පුංචි කාලෙ නෙවෙයි "

වටොර. මන්ද අතරින් ලිස්සා ගියේ ය.
දෙපා. පොළොවෙහි ගැටුණේ ය. අනතුරුව ඇඳ වෙත මෙහෙය වුණේ ය.


" පුංචි කාලෙ නෙවෙයි තමයි "
සැප මෙට්ටය.  එබී ගියේ ය.
ඇය.  ඒ  මත කෙලිදෙලෙන් ස්ථානගත වූයේ ය. වදන් හා අනුනාද වෙමින්.

"ඔයා මට කලින් ඔහොම කියලා නැහැනෙ"
ඔහු.  වීදුරුවෙහි වූ අයිස් කැටයකට ප්‍රශ්නය යොමු කලේ ය.

" එතකොට අපි බැඳලා නැහැනෙ"
ඇය. කොට්ට දෙක අතර දාරයට පිළිවදන් දුන්නා ය. ඒ මත පෙරළී යමින්.

අයිස්. උඩු තල්ලත් දිවත් අතර සිරවි නතර වුණේ ය. ද්‍රවමය සංයෝගය  උගුරෙන් පහලට යවමින්.
වීදුරුව. යලි ටීපෝව මත තැබුණේ ය. අළුත් වතුර රවුමක් අඳිමින්.
ඇඳ. සසල වී නිසල විය. ඔහුගේ  බර දරමින්.
වදන්. අනායාසයෙන් පිටව ආයේ ය. ආයාසයෙන් එක්කල නොසැලකිල්ලකුත් කෙළිලොල් බවකුත් සමඟම.
" කවුද ඒ කියල කියන්න කැමති ද? "

" හොල්මනක්"

සිනාව. පුපුරා හැලුණේ ය. ඇය තුෂ්නිම්භූතව බලා සිටිද්දී.
ඔහු.  ඇයව තමා වෙත ඇදගත්තේ ය. සිනා සෙමින්ම.

ඇය. ඇදී යාමට ඉඩ  හැරියා ය. ඒ අතර දෙඩුවා ය.

" බොරු නෙවෙයි. ඔෆිස් එකේදි. අල්මාරියක් ලඟදි. "

" දවල් ද ? "

" නෑ. හවස ! හත හමාරට විතර"

සුසුම්. ඔවුහු ආශ්වාස ප්‍රාශ්වාසයන් දැනෙන තරම් ලංවී සිටියෝ ය.
හඬ. රාගනිශ්‍රිත ව බිඳෙමින් තිබිණි.

" ඉතිං. හොල්මන ලොකු ද ? "

" ලොකුයි කියන්නෙ. ඔයා ... .. .. ..."
වාතය.  ස්වරතන්තු හරහා ගලායාම වැළකී ගියේ ය. පිටාර මුවවිට එකවරම වැසී ගිය හෙයින්.
ඇය. අනපේක්ෂිත චුම්බනය පිලිගත්තා ය. නෙත් විසල් කර ගනිමින්.

එතැන් සිට. තාරුණ්‍යය ද අවස්ථාව ද  සීතල ද මධ්‍යසාර ද හෝමෝන ද බොහෝ දේ කලෝ ය. ඇතිරිල්ලෙහි රැළි සැදීම ද ඇතුලත්ව.

රැළි. එකසිය හැත්තෑ හයක් තැනෙද්දී ඔහු බිමට බැස්සේ ය. ඇඳෙන්.
ඇවිද ගෙන ගියේ ය. සිය ඇඳුම් බෑගය වෙත.

ටියුලිප් යායක්. ඇඳ මත විකසිතව තිබුණේ ය. වායු සමනයේ සිහිල විඳිමින්.

ඔහු. ආපසු හැරී ආවේ ය. බෑගයෙන් යමක් ගෙන. ආයාසයෙන් හිනාවක් නඟා ගෙන.
ඇය ඔහු හා තමා අතර අවකාශය පුරා ප්‍රශ්නාර්ථයක් පතුරුවා හරිමින් බැලුම් හෙළුවාය.

" අම්මලගෙ මනස්ගාත.!! ඔයාව සැක කරල නෙවෙයි. !!! " ඔහු මෝඩ ස්වරයෙන් ඇගේ බැල්ම මඟ හැරියේ ය.
ටියුලිප්. හැකිළී පර වී ගියේ ය.

සුදු රෙද්ද. ඇතිරිල්ල මත රැළි දිගහරිමින් සිටියේ ය.
ඇය. තවතවත් ඇඳ විට්ටම දෙසට ගුලි වෙමින් සිටියා ය.

සුරත. ඔහු තම සුරත ඇගේ වමත මත තැබී ය.
" ලයිට් නිවන්න! "

විශ්මය. ඔහු යමක් කියන්නට තැතනී ය.
" ලයිට් නිවන්න! "

විදුලි බුබුලු. නිවී ගියේ ය.
ඔහු.  ටියුලිප් යායක් සොයා සටන් වැද වද මලක් මත ජයපැන් වැගිරී ය.
ඇය. සින්ඩරැල්ලා කථාවේ රෑ දොළහ වදිද්දී ම නින්දට වැටුණා ය. කුමාරයා තනිව නටා අවසන් වූ පසු.


*
*
*
*
*
*

අවදි වූවා ය. විනාඩි දෙසිය අනූවකට පසු.

විදුලි බුබුලු. දැල්වී තිබිණි.
ඔහු. මිලින වී සිටියේ ය. නිදි වර්ජිත ව. හිඳගත්වන ම.

"ඇයි ?"  ඇය නිදිගැට අතරින් ඇසුවා ය. ඔහුගේ පිටෙන්.
" ඔයාට තිබුණ මට කලින්ම ඕක කියන්න " ඔහු  ඇය දෙසට හැරෙමින් කීවේ ය. සම්පූර්ණයෙන්ම. අංශක එකසිය අසූවක්.






"කියන්න තමයි හිටියෙ !!"
"ඉතිං?"
"ඔයා මං කියන ඒව විශ්වාස කරන්නෙ නෑනෙ!! මට ඉවර වෙනකල් කියන්න දෙන්නෙත් නෑනෙ !! "
" හරි! මං අහගෙන ඉන්නම්. දැන්වත් කියනවා කවුද මේක කලේ ?? "


කොට්ටයක්. ඇය හා ඇඳ විට්ටම අතරට ආවේ ය. ඇය. හිස වෙනුවට පිට කොට්ටයට තෙරපා ගත්තා ය. නළලෙන් පටන් ගෙන පිටුපසට හිස ඇඟිලි ගෑවා ය.


"  පුංචි කාලෙම කූඹි කෑවා...!!! කළු කූඹි .......!!!"

සුදු රෙද්ද. ඇගේ විලුඹ අසලින් අවසන් වන්නට එලී තිබිණි. නොඉඳුල් ව.
රැළි. සුදු රෙද්ද මත වූයේ ඉතා අඩුවෙනි.

Tuesday, December 6, 2016

:: පැන්සල් හා බර ::

කැඩෙන තරමට උල්වුණාම යි
පැන්සලක් ඇනෙන්නේ ගැඹුර ට
පෙනෙන මානෙට ලංවුනාම යි
සැර දැනෙන්නේ වා කපොල්ල ක

හිස් වෙන්න මොහොතකට පෙරදි යි
බෝ වටින්නේ බඳුන් ලූ මධු
ශුන්‍යයට ඩිංගක් මෙහායින්
පිහිටුවා ඇත බර වැඩිම තැන

Saturday, December 3, 2016

Love and Revolution

පැතුම් දරමින් මියෙන හීනෙක
දෙනෙත් බෝ විට අසරණ යි
සහෝදර නෙත් හිසවැනූයෙන්
තැලී මිලින වු මල් බොහොයි


තව්තිසාවෙත්  වෙනස් නැතිව ම
පිනෙන් අඩු දෙවිවරු වෙසෙයි 
මහේසක් දෙවිවරුන් පමණක්
අරුත් දම් දෙක අර්ථ දෙයි 

බොහෝ බලි බිලි අත්වැර දි මිස
ප්‍රශ්න නැඟුමට කැප නොවෙයි
ප්‍රේමය ම පමණක් නොවේ සකි
විප්ලවය වුව චපල වෙයි. ....

Thursday, May 5, 2016

:: කුළු පොලු ::

එදා ද විරෝධතාවයක් තිබිණි. උද්ඝෝෂකයෝ ද මඬින්නෝ ද සූදානම්ව සිටියෝය. එකිනෙකා කෙරෙහි හොරෙන් බලමින්. අහඹු ලෙස නෙතු පැටළුන විටෙක මළානික සිනා පාමින්. වරෙක සැකයෙන්. අනුකම්පාවෙන්. නොසැලකිල්ලෙන්. තරහෙන් පිලිකුලෙන්.

විරෝධයට ලක්වන්නෝ ද අණ දෙන්නෝ ද දුරින් සිට බලා සිටියහ. පොළොවට මීටර් ගණනක් උසින්. වීදුරු තුලින්. ජනෙල්වල හෝ වීඩියෝ තිරයන්හි.

යකඩ. ගල්. වතුර. රබර් හා ලී. විවිධාකාර හැඩයෙන් යුතුව තැන තැන තිබිණි. නිශ්චලව. නිශ්චිත කාරියක් ඇතිව. වීදුරු. වයර් හා ප්ලාස්ටික් පසෙකින් ඇතිව.

අවශේෂ ජනයා ද සුළඟ ද අවුරැස් ද ඔහේ පාවෙමින් පැවතුණෝ ය. සංසාර චක්‍රය පුරමින්.

සාම්ප්‍රදායානුකූල බෝඩ් ඉස්සීම කෑ ගැසීම ගීත ගායනා කිරීම යන අංගයන්ගෙන් පසු ඇරඹුනේ විරෝධතා පා ගමන යි.

නියමුවෝ ද නියමුවන් ගේ ඉදිරි අනුප්‍රාප්තිකයන් ද ඉදිරියෙන් ම ගියහ. කැපවීමෙන් අභිමානයෙන් හා බලාපොරොත්තුවෙන්.

පසුපසින්ම යන්නෝ ද සිටිය හ. බෑ කියන්නට බැරි කමට කොන් වීමට බියෙන් චේන්ජ් එකකට හෝ තම සිත් ගත් අයවළුන් යන හෙයින් වැනි නේක කාරනාවන් තිබූ.

මැද්දෙන්. සාමා ද අමර ද ඈන් ද ටාරෝ ද මුරු ද ඇවිද ගියෝය. සරෝජා සමඟින්.

බැරියරය. යකඩ වැටවල් තුනකින් යුතු විණි. එක පෙලට සිටවූ. පාර දෙකට බෙදමින්. පෝස්ටර් ද බැනර් ද බෝඩ් ද එක් පසෙකටත් කුළු ද පොලු ද කඳුළු ගෑස් ද උණ්ඩ ද තව පසෙකටත් වෙන් කරමින්.

ඉදිරියෙන්ම ගිය අය. බැරියරයේ හැපී නොහැපී මෙන් නතර වූහ. ආපසු හැරුණා හ. කෙලින් සිට ගත්හ. පෙලෙහි මැද්දෙන්ම සිටි කෙනා අතට මෙගා ෆෝනයක් පත්කල හ.

මෙගා ෆෝනය. සුපුරුදු සංඛ්‍යාතයන්ගෙන් කම්පනය වීම ඇරඹීය. සුපුරුදු අනුපිළිවෙලින්ම.

බොහෝ විස්තරකිරීම් වලින් පසු ඒ රණකාමී වදන්පෙල පිට කෙරිණි. බැරියරයෙන් එහා පැත්ත ද මෙහා පැත්ත ද පාරේ දෙපැත්ත ද වීදුරු වල ඉදිරියද අමන්දානන්දයට පත් කරමින්.

" මේ විදිහට බාධක පිට බාධක දැම්මත් එකා පිට එකා වැටුනත් අපේ ගමන අපි යනවා...!!! අපිව නවත්තන්න කාටවත් බැහැ!! "

අනතුරුව. තත්පර හතලිස් තුනක නිහැඬියාව.

මුලින්ම අත තැබූයේ මෙගාෆෝනයට දෙදෙනෙක් දකුණින් සිටි කෙනා ය. ඒ මැදින් තිබූ යකඩ වැටට ය.

ඒ මොහොතේම. අනෙක් අය ක්‍රියාත්මකවන්නට කලින්. ටාරෝ ඉදිරියට ආවේ ය. අතින් ඇද්දේ ය. මෙගාෆෝනයෙන් වර්ධනය කල හඬ හිමියාගේ.

" අයියෙ! ඇයි මේක කඩාගෙන යන්නෙ? "
ඔහුට පිළිතුරු ලැබුණි. විශ්මයෙන්. නොරිස්සුමෙන් නමුත් ආඩම්බරයෙන්.
" මේ ඉල්ලීම් ටික මහ එවුන්ට බාර දෙන්න"

ඊලඟ ප්‍රශ්නය තිබුණේ සාමාට ය. නමුත් ඊට පෙර ක්‍රියාව හා ප්‍රතික්‍රියාව ඇරඹී තිබිණි. යකඩ බැරියර් තුනම එහාට මෙහාට ඇදෙමින්. බලතුලනය වන ලක්ෂ්‍යයන් විසින් තැනෙන රේඛා වෙනස් කරමින්.

මුරු. මෙගාෆෝනය සියතට ගත්තේ ය. 'කීං' ගාන ප්‍රමාණයට වඩා මඳක් අඩුවෙන් ශබ්ද පරිමාව සැකසී ය. මයික්‍රපෝනය සාමා දෙසට ලං කලේ ය.

ගැහැණු විලාපයකට බොහෝ දෑ කල හැක. එහෙයින්ම සියල්ලෝ තම කටයුතු නවතා මෙගාෆෝනයෙන් ඇසුණු " අම්මේ...." ආකාරයෙන් වූ හඬ දෙසට හැරුණහ. බැරියර්. මඳ අස්වැසිල්ලක් ලද හ.

ඒ ලද නිමේෂයේ සාමා තමන්ගේ ප්‍රශ්නය ඇසුවා ය.

" ඔය ලියුම අදම දෙන්න ඕනෙ ද ? මෙච්චර කරදර විඳගෙන ! "

ඇතැමෙක් සිනාසුන හ. ඇතැමෙක් විශ්මයට පත් වූහ. බොහෝ දෙනා කෝප වූහ. සාමා වටකරගත් හ. සරෝජා ද අමර ද ඈන් ද ටාරෝ ද මුරු ද සමඟින්.

ඇතැමෙක් පහර දෙන්නට තැනූ හ. නියමුවන් ඔවුහු වැලකූ හ.

" පිස්සු ද ? "

නියමුවකු ඇසූ පළමු ප්‍රශ්නය විණි. අනතුරුව පැහැදිලි කිරීම.

" හෙට මේක දෙන්න ගියාම උන් බාරගයි. ඒත් උන්ට දැනෙයි ද? මීඩියාවලින් අපිට කවරේජ් එකක් දෙයි ද?
වෙන එකක් තියා පැළුණු ඔළුවක්වත් නැතිව මිනිස්සු අපි කියන දේ අහයි ද ? "

සාමා ද අමර ද ඈන් ද ටාරෝ ද මුරු ද සරෝජා ද හැරුණෝ ය. බැරියර දෙසට. ඉඩ පාදා ගනිමින් ඉදිරියට ගියෝ ය.

බැරියරයෙහි එහා පස. වික්ෂිප්ත දෑස් රැසක් බලා සිටියෝ ය.

සාමා ද අමර ද ඈන් ද ටාරෝ ද මුරු ද ඇවිද ගියෝය. සරෝජා සමඟ. කැතට ඇදවී තිබූ බැරියරය සැකසූ හ. පෙර පරිදි ම.

පොලොවට උඩින් වෙසෙන අය. නොසන්සුන් වෙමින් සිටියෝ ය.
ප්‍රශ්න ඇසූ හ.

" සර් ! උන් බැරියර් එක ආපහු හැදුවා!!" යන්න පිලිවදන් ලැබූ හ.

සාමා ද අමර ද ඈන් ද ටාරෝ ද මුරු ද සරෝජා ද ආපසු සිය පිරිස දෙසට හැරුණෝ ය. තැනින් තැන විසිරී ගියෝ ය. උද්ඝෝෂකයන් මැඳ. ලඟ සිටියවුන් වැලඳ ගත් හ. උන් හා අත්වැල් බැඳගත් හ. උන්ටත් එසේ කරන්නැයි කීහ.

උද්ඝෝෂකයන්. සෙමෙන් සෙමෙන් උන් හා එක් වූහ. මුලින් සැකයෙන්. පසුව සෙනෙහෙන්.

බැරියරයට මෙහායින්. අත්වැල් දම්වැලක් තැනී තිබිනි.

උද්ඝෝෂකයෝ නිවෙමින් සිටියෝ ය. ලඟ සිටින එකා හා හිනැහෙමින්. වඩා පැහැදිලිව හඳුනාගනිමින්.

අනතුරුව. ජනප්‍රිය ප්‍රේම ගීයක් ගැයීම ඇරඹූහ. මුලින්ම තැනින් තැන. තතනමින්. පසුබාමින්. පසුව ඒකතානයෙන්. ජවයෙන්.

වීදුරු ද වයර් ද ප්ලාස්ටික් ද ඔවුන් දෙසට හැරුණෝ ය. පාරේ පාවෙමින් සිටි ප්‍රෝටීන් හා කැල්සියම් රූපයන් ද මොහොතකට හෝ සිතිවිලි ලබමින් නතර වූහ.

පෝස්ටර් ද බැනර් ද සිය ස්ථාන වෙනස් කරගනිමින් සිටියෝ ය. උද්ඝෝෂකයන් හා බාහිර පරිසරය අතරට පැමිණෙමින්.

පොලොවට උඩින් වෙසෙන අය. නොසන්සුන් වෙමින් සිටියෝ ය.
ප්‍රශ්න ඇසූ හ. නියෝග නිකුත් කල හ.

" සර්! ගහන්න පටන්ගන්නවත්, මුන් වැරැද්දක් කරන්නෙ නෑනෙ!" යැයි පිළිතුරු ලද හ.

Sunday, March 27, 2016

:: නම් නැති 10 ::

රටක් කියන්නේ පස් ගොඩක්
වැටෙන තුරු උණු ඩා බිඳක්

හිතක් කියන්නේ දිය පිටක්
වදින තුරු සුුසුමක සරක්

Saturday, March 12, 2016

:: නම් නැති 09 ::

තිර මාත්‍රා නැති දෙකකි
පෙම හා වැහි යනු
වරෙක සෑහේ ඇබින්දත්
වරෙක මඳ වේ අනෝරාවත්

Saturday, February 13, 2016

:: වැලන්ටයින් ::

ඇය.
බොහෝ ලස්සන නොවූවා ය. කොහෙත්ම කැතනොවූවා ය. එතරම් කථා නොකලා ය. බොහෝ සිහින දුටුවා ය. ඒ සියල්ල වම් කෝෂිකාවට යටින් තැන්පත් කර ගත්තා ය. අනායාසයෙන් ම. ඇයටත් නොදැනී.

ඔහු.
අඩි පහයි අඟල් නවය හමාරක් උස වූයේ  ය. රෙඩි මේඩ් කමිස ඇන්දේ ය. එහෙයින් පපුව හා උදරයේ මිමි නොදත්තේ ය.

ඔවුහු.
වර්ණයෙන් තළෙලු වූහ. වීර කථාවක් අවසානයේ පෙම්වතුන් වූහ. බස් රියක් පසුබිම් කොටගත්. සෙනඟ පිරුණු දිනයක. සරමක් ඇඳි මහල්ලෙක් දුෂ්ඨයෙක්  වුණ. සිය වම් අතින් ඇගේ ඩෙනිමේ ඝනකම සොයන්නට ගිය.

ප්‍රේමය.
දකුණතේ සුලැඟිල්ලෙන් ඇරඹී මහා ප්‍රාචීරය ආසන්නයේ බොහෝ කලක් සිරවී  සිටියේ ය. අනතුරුව වම් පයේ සුලැඟිල්ලෙන් බැස ගියේය. උද්‍යානයට පොලිසියෙන් පැන පැය අසූ හතකට පසු.

එතැන් සිට.
ඔහු කථාව අඩු කලේ ය. ඇය ගේ කථාවද අඩු කරමින්. ඒ වෙනුවට. ඩෙනිම් වල බර කිරන්නට වැඩි කාලයක් වෙන් කලේ ය. ඩෙනිමක් වෙන්නට යත්න දැරී ය. ඇය මැටි අච්චුවක් වූවා ය. හැරෙන නැවෙන දිගහැරෙන. නමුත් ප්‍රතිචාර නොදක්වන. පසුව බෝනික්කියක වූවාය. තිරසට තැබූ සැනින් නෙතුපියන.

ඔහු.
නොසන්සුන් වෙමින් සිටියේ ය. බෝනිකි නිමේශයන් හිදී වඩා දහදිය වැගිරුවේ ය. හොඳම මිතුරාගේ කීමට පෙති බිව්වේ ය. රටඉඳි කෑවේ ය. බෝනික්කන්ට පන දෙන අයුරු ගැන පොත් කියෙව්වේ ය. අන්තර්ජාලය පීරා සෙව්වේ ය. කථාව තවත් අඩුකලේ ය. කෘෂ වන්නට පටන් ගත්තේ ය.

*********************************************************************************

අගුල.
වෙනදාට වඩා සියුමැලි අතකින් කැරකුණේ ය. වැසුණේය.

ඔහු.
මුලින් ඇඳ මත වැටුණේ ය. ඇය විසින් තල්ලු කරනු ලදුව. මෘදු ලෙස.
අනතුරුව ඇයට ඉඩදී බලා සිටියේ ය. සිය දෙපා හා දෑත් ගැට ගසන තුරු. විශ්මයෙන් ප්‍රහර්ෂයට පත් වෙමින්.

ඇය.
මුලින් ඔහුගේ නාසය ඉම්බා ය. අනතුරුව ලවන්. ඉන්පසු බෝනිකි වෙස අත්හරිමින් බොහා් දෑ කලා ය.

ඔහු.
සියල්ල අවසන් කලේ ය. වෙනදාට වඩා ඉක්මනින්. අතපය බැඳ තිබියදී ම.

ඇය.
ඔහුගේ දෑසට එබුණා ය. පපුව මත කඩා වැටුණා ය. දහදිය සේදෙන්නට තරම් හැඬුවා ය. අනතුරුව හඬ අවදි කලා ය. මුක්කන්  ස්වරයෙන්.

" ඔයා දන්නවද? අද වැලන්ටයින්. මට තෑග්ගක් කෝ "

ඔහු.  විපිලිසරව ගියේ ය. තැතනී ය. අත ලිහාගන්නට යත්න දැරී ය.
ඇය.  ඔහුව වැලැක්වූවා ය.
 
" වෙන තෑගි එපා. අද දවසම මාත් එක්ක කථා කර කර ඉන්න පුළුවන් ද ? "





Saturday, January 16, 2016

:: සංජානන ::



ස්නායු. මිනිස් සිරුරේ සියළු සංජානනයන් සිදුකරන සන්නිව‍ේදන ජාලය වන්නේ ය. සංව‍ේදක ඉන්ද්‍රියයන්ගෙන් ග්‍රහණය කරගන්නා දැනීම් හැඟීම් හා සසඳා දක්වන ප්‍රතිචාරය ප්‍රකාශනය කිරීම දක්වා ක්‍රියාවලියෙහි අතරමැදි දූතයා වන්නේ ය.

සමරජීව මහතා. මේ ගැන තව තවත් විස්තර කලේ ය. සිය ගැබ්බර බිරිඳට.

මිනිසුන්. ඉපදෙන විට සහස් සංඛ්‍යාත ස්නායූන්ට හිමිකම් කීවත්, ලදරු විය ඉක්මවත් දී ඒ බොහෝ ස්නායූන් මැකී යන්නේ ඒවා නිසි පරිදි ස්ථාවර වීමට අවශ්‍ය  සංජානනයන් නොලැබෙන නිසා බවද විස්තර කලේ ය. එම ස්නායු සම්බන්ධතා සවිමත් කරවීම තුලින් අති දක්ෂ දරුවකු තනාගත හැකි බවද, නමුත් එසේ වන්නේ දැනුම හා බුද්ධිය වර්ධනය වන ආකාරයේ සංජානනයන් දරුවාට ලබා දුනහොත්  පමණක් බවද කීවේ ය.

ඊට දින දෙකකට පසු. දරුවාගේ මොළය මව්කුසේ සිටම වැඩෙන බවත්  එහෙයින් මවගේ ශාරීරික හා මානසික  සෞඛ්‍යය  ඉතා වැදගත් බවත් පත්තරයකින් කියෙව්වේ ය.

එතැන් සිට. සමරජීව මහත්මිය හයට නැඟිට්ටා ය. හෝඩි පොත හඬනගා කියෙව්වා ය. ඉඟුරු දැමූ දොඩම් යුෂ වීදුරුවක් බිව්වා ය. සැමියාට කෑම  හදමින් ඔහු අසන බුද්ධි පරීක්ෂණ ගැටළු විසඳුවා ය. ටෙලි නාට්‍ය අතහැරීමට  සිදුවූ  අතර 'ඩිස්කවරි'  නාළිකාවෙන් සෑහීමකට පත් වීමට සිදුවූවා ය. නින්දට පෙර 'සුඩොකු' ප්‍රහේලිකාවක් විසඳීම අනිවාර්යය වූ අතර කුමන ආකාරයේ හෝ ආගමික හෝ ප්‍රබන්ධ කෘතීන් පරිශීලනය නොකලා ය.

රුවන් ඉපදෙන විට. නිවසේ තුබූ සියළු අනවශ්‍ය පොත්පත් රූ සටහන් ආදිය ගින්නෙහි හොවා තිබිණි. ඔහුගේ පියා විසින්.


සමරජීව මහතා. වඩ වඩා කාර්යය බහුල වූවේ ය. රුවන් ට ග්‍රාම්‍ය කතන්දර කියා දීමට ඉඩ නොදුන් හේ ඒ වෙනුවට ලොව ප්‍රකට විද්‍යාඥයන්ගේ ජීවිත කථා කියා දෙන්නැයි සිය බිරියට කීවේ ය. ඇය නොදන්නා ඒවා කියා දුන්නේ ය. නැලවිලි ගි වල සමප්‍රදායික වචන වෙනුවට රසායන විද්‍යා , භෞතීය විද්‍යා හෝ පරිගණක විද්‍යා වචන යොදා දුන්නේ ය. වැරදි සංජානනයන් බලවත්විය හැකි හෙයින් බාහිර පුද්ගලයන් හට රුවන් හා ගැටීමට ඇති අවස්ථාවන් අවම කලේ ය. ඉඳහිටක මුණගැසුනත් සුරතල් කිරීම් ආදිය ට ඉඩ නොදුන්නේ ය. ඒ වෙනුවට රුවන් ට ' ඉමෝෂනල් ඉන්ටෙලිජන්ස්  ' ආශ්‍රිත වැඩසටහන් නැරඹීමට සැලැස්සුවේ ය. කාන්සිය මැකීමට ඉහල 'අයි කිව්' අගයකින් යුත් 'වර්චුවල් ඇසිස්ටන්ස්' වැඩසටහනක් බාගත කර දුන්නේ ය.

කාලය. ගෙවී ගියේ ය. රුවන්ට පාසල් ගමනක් නොවූ අතර විශේෂයෙන් තෝරාගත් ගුරුවරුන් පිරිසක් නිවසට ආහ. රුවන් ඉතා දක්ෂ ලෙස විෂය කරුණු උකහා ගනිමින් සිටියේ ය.  සියල්ලන්ගේම තක්සේරුව අනුව.

*********************************************************************************
රාජ කුමාරයා. පුහුණුකර ඇති පරිදිම සිය පියාගේ නමින් ඔහු ඇමතූ රුවන්, රාජ කුමාරවරු හා රජවරුන් යනු කවුරුන්දැයි ඔහුගෙන් ඇසී ය. මඳක් පසුබා ගියද, දරුවා හට මුසා නොකිය යුතු හෙයින් රජවරුන් යනු, මිනිස් ශිෂ්ඨාචාරයේ පූර්ව අවධියක පරම්පරාවෙන් පාලනය උරුමකරගත් පිරිසක් බවත්, රාජකුමාරයන් යනු ඔවුන්ගේ දරුවන් බවත් කියා දුන්නේ ය. 

තවදුරටත්. දැන් එවැන්නවුන් නැති බවත් ජනතාව දැනුවත් බවත්, තමාට අවශ්‍ය පාලකයන් තමා අතරින්ම තෝරා ගන්නා බවත් පැහැදිලි කලේය. 

අවසානයට. ඔහු රාජකුමාර කතාව දැනගත්තේ කොහෙන්දැයි ඇසීය. එහි ප්‍රතිඵලයක් ලෙස රුවන්ගේ ආච්චිට සහ සීයාට ඔහුගේ නිවස තහනම් කලාපයක් විණි.

රුවන්. රජවරුන් ගැන කථා තහනම් බව දැන ගත්තේ එසේ ය.

ඒ හේතුවෙන්ම. තමන් අකුරෙන් අකුර ගැටගසා කියවන බාගෙට දැවී ගිය පොත ඇඳෙහි මෙට්ටය යටින් තව තවත් එහාට තල්ලු කලේය.